Kerala Express

ന്യൂഡല്‍ഹി: അതിര്‍ത്തിയില്‍ നിയന്ത്രണരേഖയ്ക്കു സമീപം പാക്കിസ്ഥാന്‍റെ സൈനിക പോസ്റ്റുകള്‍ നിലംപരിശാക്കി ഇന്ത്യയുടെ ശക്തമായ തിരിച്ചടി. നൗഷേരയിലെ പാകിസ്ഥാന്‍ സൈനിക പോസ്റ്റുകള്‍ ബോംബിട്ടു തകര്‍ക്കുന്ന ദൃശ്യം ഇന്ത്യന്‍ സേന പുറത്തുവിട്ടു. ജമ്മു കാഷ്മീരില്‍ സമാധാനം നിലനിര്‍ത്തുന്നതിനായി ഭീകരതയ്ക്കെതിരെയുള്ള ശക്തമായ തിരിച്ചടിയെന്നാണ് മേജര്‍ ജനറല്‍ അശോക് നരുല സംഭവത്തെക്കുറിച്ച് മാധ്യമങ്ങളോടു വിശദീകരിച്ചത്. താഴ്വരയിലെ യുവാക്കളെ മോശമായി സ്വാധീനിക്കുന്ന നുഴഞ്ഞു കയറ്റക്കാര്‍ക്കെതിരെ ശക്തമായ തടയിടാന്‍ കഴിഞ്ഞിട്ടുണ്ടെന്നും മേജര്‍ ജനറല്‍ അശോക് നരുല വ്യക്തമാക്കി. മൂന്നാഴ്ച മുമ്പ് രണ്ട് ഇന്ത്യന്‍ ജവാന്മാരെ പാക് സൈനികര്‍ കഴുത്തറുത്ത് കൊന്നതിനുള്ള തിരിച്ചടിയാണിത്.

ലണ്ടന്‍: ബ്രിട്ടനിലെ മാഞ്ചസ്റ്റര്‍ അരീനയില്‍ അമേരിക്കന്‍ പോപ് ഗായിക ‌അരിയാന ഗ്രാന്‍ഡെയുടെ സംഗീത വേദിയില്‍ ഇസ്ലാമിക് സ്റ്റേറ്റ് നടത്തിയ ചാവേര്‍ ആക്രമണത്തില്‍ കുട്ടികള്‍ ഉള്‍പ്പെടെ 22 പേര്‍ കൊല്ലപ്പെട്ടു. 59 പര്‍ക്കു പരുക്കേറ്റു. കുട്ടികളും യുവാക്കളുമാണു ദുരന്തത്തില്‍പ്പെട്ടതില്‍ ഭൂരിഭാഗവും. സംഗീത പരിപാടിക്കു ശേഷം ആളുകള്‍ പുറത്തേക്ക് ഇറങ്ങിവരവെയാണ് ചാവേര്‍ പൊട്ടിത്തെറിച്ചത്. 22 വയസുള്ള സല്‍മാന്‍ അബദിയാണു ചാവേര്‍ എന്നു പോലീസ് അറിയിച്ചു. ആക്രമണത്തിന്‍റെ ഉത്തരവാദിത്തം ഐഎസ് തങ്ങളുടെ ഔദ്യോഗിക ഓണ്‍ലൈന്‍ മാധ്യമമായ അമാഖിലൂടെ ഏറ്റെടുത്തു.
പരിപാടിക്കായി 21,000 ആളുകള്‍ സ്റ്റേഡിയത്തില്‍ എത്തിയിരുന്നു. ഇരുപത്തിമൂന്നുകാരിയായ ഗ്രാന്‍ഡെയുടെ ആരാധകരില്‍ ഭൂരിഭാഗവും കുട്ടികളും യുവാക്കളുമാണ്. പരിപാടിക്കുശേഷം ഗ്രാന്‍ഡെ വേദി വിട്ടതിനു പിന്നാലെയാണ് സ്ഫോടനം. ഗ്രാന്‍ഡെ സുരക്ഷിതയാണെന്ന് അവരുടെ വക്താവ് അറിയിച്ചു. സ്ഫോടനത്തിന്‍റെ പശ്ചാത്തലയില്‍ ലോകയാത്ര റദ്ദാക്കുന്നതായി ഗ്രാന്‍‍െഡ ട്വിറ്ററിലൂടെ അറിയിച്ചു. രണ്ടു തവണ സ്ഫോടനം നടന്നതായി ദൃക്സാക്ഷികള്‍ പറഞ്ഞു. യൂറോപ്പിലെ ഏറ്റവും വലിയ ഇന്‍ഡോര്‍ അരങ്ങാണ് മാഞ്ചസ്റ്റര്‍ അരീന. പരുക്കേറ്റവരെ മാഞ്ചസ്റ്ററിലെ  വിവിധ ആശുപത്രികളില്‍ പ്രവേശിപ്പിച്ചതായി ഗ്രേറ്റര്‍ മാഞ്ചസ്റ്റര്‍ പോലീസ് ചീഫ് കോണ്‍സ്റ്റബിള്‍ ഇയാന്‍ ഹോപ്കിന്‍സ് പറഞ്ഞു.

Sponsored Advertisments

TSI-Adv
GP-Adv2