Kerala Express

കോട്ടയം: ആലപ്പുഴയിലെ ലേക്പാലസ് റിസോര്‍ട്ടിലേക്കു വയല്‍ നികത്തി റോഡ് നിര്‍മ്മിച്ചെന്ന കേസില്‍ മുന്‍മന്ത്രി തോമസ് ചാണ്ടിയെ ഒന്നാം പ്രതിയാക്കി കോട്ടയം വിജിലന്‍സ് കോടതിയില്‍ എഫ്ഐആര്‍ സമര്‍പ്പിച്ചു. പുതിയ അന്വേഷണ സംഘമാണ് എഫ്ഐആര്‍ സമര്‍പ്പിച്ചത്. ഏപ്രില്‍ 19ന് അന്തിമ റിപ്പോര്‍ട്ട് സമര്‍പ്പിക്കണമെന്നാണ് കോടതി അറിയിച്ചിരിക്കുന്നത്. നെല്‍വയല്‍ നീര്‍ത്തട സംരക്ഷണ നിയമം ലംഘിച്ചു റോ‍‍ഡ് നിര്‍മ്മിച്ചുവെന്ന പരാതിയിലാണ് എഫ്ഐആര്‍. മുന്‍ കളക്ടര്‍ പി. വേണുഗോപാല്‍, സബ് കളക്ടര്‍ സൗരഭ് ജെയിന്‍, എഡിഎം കെ.പി. തമ്പി എന്നിവരെയും തോമസ് ചാണ്ടിയുടെ ഭാര്യ മേരി ചാണ്ടിയെയും പ്രതികളാക്കി.

കൊച്ചി: മുന്‍മന്ത്രി കെ.എം. മാണി പ്രതിയായ ബാര്‍ കോഴക്കേസ് അന്വേഷണം പൂര്‍ത്തിയാക്കി അന്തിമ റിപ്പോര്‍ട്ട് സമര്‍പ്പിക്കാന്‍ വിജിലന്‍സ് ഹൈക്കോടതി 45 ദിവസംകൂടി അനുവദിച്ചു. അന്വേഷണം പൂര്‍ത്തിയാക്കാന്‍ വിജിലന്‍സ് കൂടുതല്‍ സമയം തേടിയതിനെത്തുടര്‍ന്നാണിത്. തുടരന്വേഷണത്തിന്‍റെ പുരോഗതി റിപ്പോര്‍ട്ട് കേസ് പരിഗണിക്കവേ വിജിലന്‍സ് മുദ്രവെച്ച കവറില്‍ കോടതിക്ക് കൈമാറി. ഇതിനോടൊപ്പമാണ് അന്വേഷണത്തിന് കൂടുതല്‍ സമയം ആവശ്യപ്പെട്ടത്. 30 ദിവസത്തിനകം അന്വേഷണം പൂര്‍ത്തിയാക്കി തുടര്‍ന്നുള്ള 15 ദിവസത്തിനകം അന്തിമ റിപ്പോര്‍ട്ട് തിരുവനന്തപുരം വിജിലന്‍സ് കോടതിയില്‍ സമര്‍പ്പിച്ച് നടപടി പൂര്‍ത്തിയാക്കാനാണ് നിര്‍ദ്ദേശം. ബാര്‍ ലൈസന്‍സ് പുതുക്കാന്‍ കോഴ വാങ്ങിയെന്ന ആരോപണത്തെത്തുടര്‍ന്ന് വിജിലന്‍സ് രണ്ടുതവണ അന്വേഷണം നടത്തിയെങ്കിലും കാര്യമായ തെളിവ് ലഭിച്ചില്ലെന്നും വീണ്ടും തുടരന്വേഷണം നടത്തുന്നത് അന്യായമായതിനാല്‍ റദ്ദാക്കണമെന്നും ആവശ്യപ്പെട്ട് കെ.എം. മാണി സമര്‍പ്പിച്ച ഹര്‍ജിയാണ് കോടതി പരിഗണനയിലുള്ളത്. അന്വേഷണത്തിന് കൂടുതല്‍ സമയം അനുവദിക്കുന്നതിനെ മാണിയുടെ അഭിഭാഷകന്‍ എതിര്‍ത്തു. എന്നാല്‍, അന്വേഷണ പുരോഗതി റിപ്പോര്‍ട്ട് തൃപ്തികരമാണെന്ന് ചൂണ്ടിക്കാട്ടിയ കോടതി അന്വേഷണം പൂര്‍ത്തിയാക്കാന്‍ കൂടുതല്‍ സമയം അനുവദിക്കുകയായിരുന്നു.

തിരുവല്ല: മലങ്കര കത്തോലിക്കാസഭ ബത്തേരി, പുത്തൂര്‍ രൂപതകളുടെ മുന്‍ അധ്യക്ഷന്‍ ഡോ. ഗീവര്‍ഗീസ് മാര്‍ ദിവന്നാസിയോസ് (67) കാലം ചെയ്തു. ആരോഗ്യപരമായ കാരണങ്ങളാല്‍ രൂപതാദ്ധ്യക്ഷസ്ഥാനം ഒരു വര്‍ഷം മുമ്പ് ഒഴിഞ്ഞ മാര്‍ ദിവന്നാസിയോസ് തിരുവല്ല കുറ്റൂരിലുള്ള സ്നേഹഭവനില്‍ (പള്ളിമല) വിശ്രമജീവിതത്തിലായിരുന്നു. തിരുവല്ല സെന്‍റ് ജോണ്‍സ് മെത്രാപ്പോലീത്തന്‍ കത്തീഡ്രലിനോടു ചേര്‍ന്ന കബറിടത്തിലാണു കബറടക്കം.

Sponsored Advertisments