Kerala Express

വില കൂട്ടി വില്‍ക്കുന്ന അന്യസംസ്ഥാന അരി കഴിക്കരുത്: മുഖ്യമന്ത്രി

തിരുവനന്തപുരം: സംസ്ഥാനത്ത് എല്ലാ പരിധികളും മറികടന്ന് വിലകൂട്ടി വില്‍ക്കുന്ന അന്യസംസ്ഥാന അരി വേണ്ടെന്നുവയ്ക്കാന്‍ ജനങ്ങള്‍ തയ്യാറാകണമെന്ന് മുഖ്യമന്ത്രി പിണറായി വിജയന്‍ പറഞ്ഞു. പുത്തരിക്കണ്ടം മൈതാനത്ത് സപ്ലൈകോയുടെ ക്രിസ്മസ് മെട്രോഫെയര്‍ സംസ്ഥാനതല ഉദ്ഘാടനം നിര്‍വഹിക്കുകയായിരുന്നു അദ്ദേഹം. ഗുണമേന്മയുടെ കാര്യത്തില്‍ വലിയ മെച്ചമൊന്നുമില്ലെങ്കിലും ഉപയോഗിച്ചുള്ള ശീലം മാറ്റാനാവാത്തതിനാല്‍ മലയാളികള്‍ ഏറെ ആവശ്യക്കാരായുള്ള ഒരിനം അരിയാണ് അരിയാണ് വിലക്കയറ്റത്തിന് കാരണമാകുന്നത്. നമ്മുടെ ഭക്ഷ്യമന്ത്രി ആന്ധ്രയിലെത്തി അവിടുത്തെ സര്‍ക്കാരുമായി ബന്ധപ്പെട്ടതിനാല്‍ മിതമായ വിലയ്ക്ക് അരി ലഭ്യമാക്കാമെന്ന് ആന്ധ്രാസര്‍ക്കാരും സമ്മതിച്ചിരുന്നു. എന്നാല്‍ ചില കച്ചവട കേന്ദ്രങ്ങള്‍ ആന്ധ്രയില്‍ സമ്മര്‍ദ്ദം ചെലുത്തി ആ നീക്കം പരാജയപ്പെടുത്തി.

കാര്‍ മെട്രേതൂണിലിടിച്ച് ബന്ധുക്കളായ മൂന്നുപേര്‍ മരിച്ചു

ആലുവ: നെടുമ്പാശേരി വിമാനത്താവളത്തില്‍നിന്നു മടങ്ങിയവര്‍ സഞ്ചരിച്ച കാര്‍ ദേശീയ പാതയില്‍ നിയന്ത്രണം വിട്ടു മെട്രോതൂണിലിടിച്ചു ബന്ധുക്കളായ മൂന്നുപേര്‍ മരിച്ചു. കോട്ടയം എസ്.എച്ച് മൗണ്ട് പെരുമ്പായിക്കാട് തലവനാട്ട് മഠത്തില്‍ രാജേന്ദ്രപ്രസാദ് (59), മകന്‍ അരുണ്‍ പ്രസാദ് (32), രാജേന്ദ്രപ്രസാദിന്‍റെ മരുമകന്‍റെ പിതാവ് നട്ടാശേരി ആലപ്പാട്ട് ചന്ദ്രന്‍ നായര്‍ (63) എന്നിവരാണു മരിച്ചത്. കഴി‍ഞ്ഞയാഴ്ചയായിരുന്നു ചന്ദ്രന്‍ നായരുടെ ഇളയ മകന്‍ ശ്രീജിത്തിന്‍റെ വിവാഹം. വിവാഹത്തില്‍ പങ്കെടുത്തശേഷം വിദേശത്തെ ജോലിസ്ഥലത്തേക്കു പോകുന്ന ചന്ദ്രന്‍നായരുടെ മൂത്തമകനെ നെടുമ്പാശേരി വിമാനത്താവളത്തില്‍ യാത്രയാക്കി മടങ്ങുകയായിരുന്നു സംഘം. അരുണ്‍ പ്രസാദാണ് കാര്‍ ഓടിച്ചിരുന്നത്.

ഉദുമല്‍പേട്ട ശങ്കര്‍ ദുരഭിമാനക്കൊല: 6 പേര്‍ക്ക് തൂക്കുകയര്‍

തിരുപ്പൂര്‍: തമിഴ്നാട്ടിലെ ഉദുമല്‍പേട്ടയില്‍ ഇരുപത്തിരണ്ടുകാരനായ ദളിത് യുവാവിനെ വെട്ടിക്കൊലപ്പെടുത്തിയ കേസില്‍ ആറു പേര്‍ക്ക് വധശിക്ഷ. ഒരാള്‍ക്ക് ഇരട്ടജീവപര്യന്തവും മറ്റൊരാള്‍ക്ക് അഞ്ചു വര്‍ഷം തടവും വിധിച്ചിട്ടുണ്ട്. ഉയര്‍ന്ന തേവര്‍ സമുദായത്തില്‍പ്പെട്ട കൗസല്യ എന്ന പെണ്‍കുട്ടിയെ വിവാഹം ചെയ്ത ദളിത് യുവാവായ ശങ്കറിനെ പെണ്‍കുട്ടിയുടെ അച്ഛനുള്‍പ്പെട്ട സംഘം നടുറോഡില്‍ പരസ്യമായി വെട്ടിക്കൊലപ്പെടുത്തുകയായിരുന്നു. പെണ്‍കുട്ടിയുടെ പിതാവുള്‍പ്പെടെ ആറുപേര്‍ക്കാണ് വധശിക്ഷ. ആക്രമണത്തിന്‍റെ ദൃശ്യങ്ങള്‍ ടെലിവിഷന്‍ ചാനലുകളിലൂടെ പുറത്തു വന്നതോടെ വലിയ ചര്‍ച്ചയായി മാറുകയും ചെയ്തു. പെണ്‍കുട്ടിയുടെ അമ്മയും അമ്മാവനും ഉള്‍പ്പെടെ മുന്നു പ്രതികളെ തിരുപ്പൂര്‍ പ്രിന്‍സിപ്പല്‍ ‍ഡിസ്ട്രിക്ട് സെഷന്‍സ് ജഡ്ജി അലമേലു നടരാജന്‍ കുറ്റവിമുക്തരാക്കുകയും ചെയ്തു. ദുരഭിമാനക്കൊലയാണ് ശങ്കറിനെ ഇല്ലാതാക്കിയതെന്ന പ്രോസിക്യൂഷന്‍ വാദം കോടതി അംഗീകരിക്കുകയായിരുന്നു. 2016 മാര്‍ച്ച് 16നാണ് ശങ്കറിനെ ഭാര്യയുടെ ബന്ധുക്കള്‍ കൊലപ്പെടുത്തിയത്. അതിനും ഒരുമാസം മുമ്പാണു ശങ്കറും കൗസല്യയും രഹസ്യമായി വിവാഹിതരായത്. ഇതോടെ കൗസല്യയുടെ എന്‍ജിനീയറിംഗ് പഠനം അവസാനിപ്പിച്ച് ബന്ധുക്കള്‍ വീട്ടുതടങ്കലിലാക്കി. എന്നാല്‍ ഒരു മാസത്തിനുശേഷം ഭര്‍ത്താവിനടുത്തേക്ക് കൗസല്യ തിരിച്ചെത്തുകയും ചെയ്തു. വധശിക്ഷയ്ക്കു താന്‍ എതിരാണെന്നു ചരിത്രപരമായ വിധിയെക്കുറിച്ചു കൗസല്യ പ്രതികരിച്ചു. എന്നാല്‍, പ്രതികള്‍ക്കു വധശിക്ഷ നല്‍കിയത് ദുരഭിമാന കൊലപാതകം പോലെയുള്ള കുറ്റകൃത്യങ്ങളില്‍നിന്ന് ഒഴിഞ്ഞു നില്‍ക്കന്‍ മിശ്രവിവാഹം നടത്തുന്നവരുടെ മാതാപിതാക്കളെ പ്രേരിപ്പിക്കുമെന്നു കൗസല്യ പറഞ്ഞു. തന്‍റെ അമ്മ അന്നലക്ഷ്മിയെ കുറ്റവിമുക്തയാക്കിയതിനെതിരെ കോടതി സമീപിക്കുമെന്നും നിരവധി തവണ തനിക്കെതിരെ വധഭീഷണി മുഴക്കിയ ആളാണ് അമ്മയെന്നും കൗസല്യ കൂട്ടിച്ചേര്‍ത്തു.

Sponsored Advertisments

GP-Adv2
TSI-Adv