Kerala Express

ശ്രീനഗര്‍: കല്ലേറു നടത്തിയ കാഷ്മീരി യുവാവിനെ ജീപ്പിന്‍റെ ബോണറ്റില്‍ കെട്ടിവച്ചു പട്രോളിംഗ് നടത്തിയ മേജര്‍ക്കു സൈനിക ബഹുമതി. മേജര്‍ ലീതുള്‍ ഗൊഗോയിക്കാണു സൈന്യം കലാപത്തിന് എതിരായ മികച്ച സേവനത്തിനുള്ള സൈനിക ബഹുമതി നല്‍കിയിരിക്കുന്നത്. കലാപകാരികളുടെ കല്ലേറു തടയാന്‍ അവരുടെ കൂട്ടത്തില്‍നിന്ന് ഒരാളെ പിടികൂടി ജീപ്പിന്‍റെ ബോണറ്റില്‍ കെട്ടിവയ്ക്കുകയായിരുന്നു. ഇതോടെ കല്ലെറിയാനാവാതെ പ്രക്ഷോഭകര്‍ പിന്‍വാങ്ങി. യുവാവിനെ ജീപ്പിന്‍റെ ബോണറ്റില്‍ കെട്ടിയിട്ട സംഭവത്തില്‍ ഇദ്ദേഹത്തിനെതിരെ അന്വേഷണം തുടരുന്ന ഘട്ടത്തില്‍ തന്നെയാണ് സൈനിക ബഹുമതിയും തേടിയെത്തുന്നതെന്നു ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. ഏപ്രില്‍ ഒന്‍പതിന് ശ്രീനഗര്‍ ഉപതെരഞ്ഞെടുപ്പ് സമയത്താണു യുവാവിനെ ജീപ്പിന്‍റെ ബോണറ്റില്‍ കെട്ടിയിട്ടത്. ജീവന്‍ രക്ഷിക്കാനുള്ള നടപടി മാത്രമാണ് സ്വീകരിച്ചതെന്നാണ് മേജറിന്‍റെ വിശദീകരണം.

ന്യൂഡല്‍ഹി: വിവാഹ മോചനത്തിന് മുത്തലാഖ് രീതി ഒഴിവാക്കി, ശരീഅത്ത് അനുശാസിക്കുന്ന നടപടിക്രമങ്ങള്‍ നടപ്പാക്കാന്‍ തീരുമാനിച്ചതായി ഓള്‍ ഇന്ത്യ മുസ്ലിം വ്യക്തിനിയമ ബോര്‍ഡ് സുപ്രീംകോടതിയെ അറിയിച്ചു. മുത്തലാഖ് പാടില്ലെന്ന് വിവാഹ സമയത്ത് വധൂവരന്മാര്‍ക്ക് ഖാദിമാര്‍ ഉപദേശം നല്‍കും. മുത്തലാഖ് രീതി അവലംബിച്ചാല്‍ സാമൂഹിക ബഹിഷ്കരണം നേരിടേണ്ടിവരുമെന്നും ബോര്‍ഡ് സമര്‍പ്പിച്ച പുതിയ സത്യവാങ്മൂലത്തില്‍ പറഞ്ഞു. ഇസ്ലാമിക നിയമത്തില്‍ മുത്തലാഖ് അനഭിലഷണീയ രീതിയാണ്. ഭാര്യാഭര്‍ത്താക്കന്മാര്‍ തമ്മിലുള്ള തര്‍ക്കം അന്യോന്യം പറഞ്ഞുതീര്‍ക്കണം. ഒറ്റയടിക്കുള്ള തലാഖ് നിരുത്സാഹപ്പെടുത്തുമെന്നും ഇത്തരം സംഭവങ്ങള്‍ കുറച്ചു കൊണ്ടുവരാന്‍ സാമൂഹിക ബഹിഷ്കരണമടക്കമുള്ള നടപടികള്‍ സ്വീകരിക്കുമെന്നും ബോര്‍ഡ് നല്‍കിയ സത്യവാങ്മൂലത്തില്‍ പറഞ്ഞു. ഏപ്രില്‍ 15, 16 തീയതികളില്‍ ലഖ്നോവില്‍ നടന്ന ബോര്‍ഡ് പ്രവര്‍ത്തകസമിതി മുത്തലാഖ് രീതിക്കെതിരെ പ്രമേയം പാസാക്കിയിട്ടുണ്ടെന്നും സത്യവാങ്മൂലത്തില്‍ ചൂണ്ടിക്കാട്ടി.
വിവാഹമോചന കാര്യത്തില്‍ ശരീഅത്ത് നിലപാട് വ്യക്തമാണ്. അകാരണമായി വിവാഹമോചനം നടത്താനാവില്ല. ഒറ്റയിരിപ്പില്‍ മൂന്ന് തലാഖ് ചൊല്ലുന്നത് ശരിയായ മാര്‍ഗമല്ല. അത്തരം രീതികള്‍ ശക്തമായിത്തന്നെ ശരീഅത്ത് എതിര്‍ക്കുന്നുണ്ട്. അനുരഞ്ജനത്തിലൂടെ തര്‍ക്കം പരിഹരിച്ചില്ലെങ്കില്‍ രണ്ടു കുടുംബങ്ങളില്‍നിന്നുള്ള മുതിര്‍ന്ന അംഗങ്ങളോ ഇരു ഭഗത്തുനിന്നുമുള്ള മധ്യസ്ഥരോ പ്രശ്നപരിഹാരത്തിന് ശ്രമിക്കും. എന്നിട്ടും രമ്യതയിലേക്കു വന്നില്ലെങ്കില്‍ ഒരു തവണ തലാഖ് ചൊല്ലും. തുടര്‍ന്നുള്ള ഇദ്ദ കാലയളവില്‍ തര്‍ക്കം തീര്‍ന്നാല്‍ ഭാര്യയെ വീണ്ടെടുക്കാം. ഈ കാലയളവില്‍ ഭാര്യാ ഭര്‍ത്തൃബന്ധം പുനഃസ്ഥാപിച്ചില്ലെങ്കില്‍ ദാമ്പത്യം അതോടെ അവസാനിക്കും.

Sponsored Advertisments