Kerala Express

ബാങ്കോക്ക്: പന്ത്രണ്ട് കുട്ടികളും അവരുടെ ഫുട്ബോള്‍ കോച്ചും കുടുങ്ങിയ തം ലുവാംഗ് ഗുഹാ സമുച്ചയം മ്യൂസിയം ആക്കാനുള്ള പദ്ധതിയില്‍ തായ് ലന്‍ഡ് അധികൃതര്‍. കുട്ടികളെയും കോച്ചിനെയും സുരക്ഷിതമായി പുറത്തെത്തിച്ചതിനു പിറ്റേന്നാണ് പദ്ധതിയെക്കുറിച്ച് അധികൃതര്‍ വ്യക്തമാക്കിയത്. രക്ഷാപ്രവര്‍ത്തനത്തിന്‍റെ ഓരോ ഘട്ടവും വിശദീകരിക്കുന്ന മ്യൂസിയമാണ് ഉദ്ദേശിക്കുന്നതെന്ന് രക്ഷാദൗത്യത്തിനു മേധാവിത്വം വഹിച്ച ചിയാംഗ് റായ് പ്രവിശ്യാ ഗവര്‍ണര്‍ നരോംഗ്സാക് പറഞ്ഞു. രണ്ടര ആഴ്ച ലോകത്തിന്‍റെ മുഴുവന്‍ ശ്രദ്ധ തം ലുവാംഗ് ഗുഹാമുഖത്തായിരുന്നു. ടൂറിസ്റ്റുകളുടെ സുരക്ഷയ്ക്കായി ഗുഹയ്ക്ക് അകത്തും പുറത്തും സംവിധാനങ്ങള്‍ ഒരുക്കുമെന്ന് പ്രധാനമന്ത്രി പ്രയുത് ചാന്‍ചെ പറഞ്ഞു.

ന്യൂഡല്‍ഹി: ഇന്‍റര്‍നെറ്റ് സമത്വ നിയമങ്ങള്‍ക്ക് ടെലികോം കമ്മീഷന്‍
അംഗീകാരം നല്‍കി. ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായി) ആണ് ഇതു സംബന്ധിച്ച നിര്‍ദ്ദേശങ്ങള്‍ സമര്‍പ്പിച്ചത്. ഇന്‍റര്‍നെറ്റ്
ഉപഭോക്താക്കളുടെ ഉപയോഗത്തില്‍ സേവനദാതാക്കള്‍ നടപ്പാക്കുന്ന വിവേചനം തടയുന്നതാണ് നിയമം. ചില നിര്‍ണ്ണായക ആപ്ലിക്കേഷനുകളും സേവനങ്ങളും നിയമത്തിന്‍റെ പരിധിക്ക് പുറത്താണ്. ഇവയ്ക്ക് മുന്‍ഗണനാടിസ്ഥാനത്തിലുള്ള നെറ്റ് ലൈനുകളും സാധാരണ സംവിധാനത്തേക്കാള്‍ മെച്ചപ്പെട്ട വേഗതയും ആവശ്യമായി വരുന്നതിനാലാണ് ഇത്. ഇന്‍റര്‍നെറ്റ് ഉള്ളടക്കത്തെ വിവേചനപരമായി ബാധിക്കും വിധം സേവനദാതാക്കള്‍ കരാറില്‍ ഏര്‍പ്പെടുന്നത് നിയന്ത്രിക്കണമെന്ന് ട്രായ് നിര്‍ദ്ദേശിച്ചു. ഏതെങ്കിലും തരത്തിലുള്ള നിയമലംഘനമുണ്ടായാല്‍ കടുത്ത പിഴ ചുമത്തും. മൊബൈല്‍ ഓപ്പറേറ്റര്‍മാക്കും സാമൂഹിക മാധ്യമ കമ്പനികള്‍ക്കും ഇത് ബാധകമാണ്.
രോഗിയെ മറ്റൊരിടത്ത് ശസ്ത്രക്രിയയ്ക്ക് വിധേയമാക്കാവുന്ന റിമോട്ട് സര്‍ജറി, മനുഷ്യരഹിത വിദൂര നിയന്ത്രിത കാറുകള്‍, ടെലിമെഡിസിന്‍ എന്നിവയെ ഒഴിവാക്കിയാണ് ടെലികോം കമ്മീഷന്‍ നെറ്റ് ന്യൂട്രാലിറ്റിക്ക് അംഗീകാരം നല്‍കിയിരിക്കുന്നത്. ഡിജിറ്റല്‍ അടിസ്ഥാന സൗകര്യങ്ങള്‍ രാജ്യത്തിന് ഏറ്റവും പ്രധാനപ്പെട്ടതാണെന്ന് ടെലികോം കമ്മീഷന്‍ യോഗത്തില്‍ പങ്കെടുത്ത എല്ലാവരും അഭിപ്രായപ്പെട്ടു.

Sponsored Advertisments