Kerala Express

കറുത്ത ദിനത്തിന് കാല്‍നൂറ്റാണ്ട്

ന്യൂഡല്‍ഹി: ഇന്ത്യന്‍ മതേതര സങ്കല്പങ്ങളുടെ അടിത്തറയിളക്കി ബാബരി മസ്ജിദ് തകര്‍ത്തിട്ട് കാല്‍നൂറ്റാണ്ട്. രാജ്യത്തിന്‍റെ മനഃസാക്ഷി നടുക്കിയ ക്രിമിനല്‍ കുറ്റത്തിന്‍റെ വിചാരണ പൂര്‍ത്തിയാവുകയോ ആരെയും ശിക്ഷിക്കുകയോ ചെയ്തിട്ടില്ല. പള്ളി നിലനിന്ന ഭൂമിയുടെ ഉടമാവകാശ തര്‍ക്കവും നിയമയുദ്ധമായി തുടരുന്നു. ബാബരി വാര്‍ഷിക തലേന്ന് സുപ്രീംകോടതി പരിഗണനയ്ക്കെടുത്ത ഉടമാവകാശ കേസിന്‍റെ അന്തിമാവാദമാകട്ടെ ഫെബ്രുവരി എട്ടിലേക്കു മാറ്റിവെച്ചു. രാജ്യചരിത്രത്തില്‍ 1992 ഡിസംബര്‍ 6 ഇരുണ്ട ദിനമാണ്. അന്നാണ് പതിനായിരക്കണക്കായ കര്‍സേവകര്‍ മുതിര്‍ന്ന ബിജെപി നേതാക്കളുടെ സാന്നിധ്യത്തില്‍ അയോധ്യയിലെ ബാബരി മസ്ജിദ് ഇടിച്ചുതകര്‍ത്തത്. തുടര്‍ന്ന് വര്‍ഗീയ കലാപങ്ങളില്‍ കൊല്ലപ്പെട്ടത് മൂവായിരത്തോളം പേര്‍. പള്ളി തര്‍ക്കവുമായി ബന്ധപ്പെട്ട ക്രിമിനല്‍ ഗൂഢാലോചനക്കേസില്‍ ബിജെപി നേതാക്കളായ എല്‍.കെ. അദ്വാനി, മുരളിമനോഹര്‍ ജോഷി, ഉമാഭാരതി, വിഎച്ച്പി നേതാവ് വിനയ് കത്യാര്‍ എന്നിവരടക്കം 12 പേര്‍ക്കെതിരായ വിചാരണ നടപടി തുടരുകയാണ്. യോഗി ആദിത്യനാഥ് യുപി മുഖ്യമന്ത്രിയായ ശേഷം ക്ഷേത്രനിര്‍മ്മാണ ലക്ഷ്യത്തില്‍ സംഘ്പരിവാറിന് ആവേശം വര്‍ധിച്ചിട്ടുണ്ട്. 2019ലെ ലോക്സഭാ തെരഞ്ഞെടുപ്പിലും അയോധ്യ ബിജെപിയുടെ തുറുപ്പു ചീട്ടായി മാറുമെന്നാണ് സൂചന.

എതിരില്ലാതെ രാഹുല്‍

ന്യൂഡല്‍ഹി: പുതുനേതൃത്വത്തിന് ഉദയംകുറിച്ചു രാഹുല്‍ ഗാന്ധി കോണ്‍ഗ്രസിന്‍റെ അമരത്തേക്ക്. പ്രസിഡണ്ട് സ്ഥാനത്തേക്കുള്ള നാമനിര്‍ദ്ദേശ പത്രിക രാഹുല്‍ സമര്‍പ്പിച്ചു. മറ്റാരും ഇതുവരെ പത്രിക സമര്‍പ്പിച്ചിട്ടില്ല. ഇതോടെ രാഹുല്‍ എതിരില്ലാതെ തെരഞ്ഞെടുക്കപ്പെടുമെന്ന് ഉറപ്പായി. മുതിര്‍ന്ന കോണ്‍ഗ്രസ് നേതാവും മുന്‍ രാഷ്ട്രപതിയുമായ പ്രണാബ് മുഖര്‍ജിയുടെ അനുഗ്രഹം വാങ്ങി പ്രമുഖ നേതാക്കളോടൊപ്പമാണ് അദ്ദേഹം പത്രിക സമര്‍പ്പിക്കാനെത്തിയത്. ജനുവരിയില്‍ എഐസിസി സമ്മേളനത്തില്‍ രാഹുല്‍ ഗാന്ധി ഔപചാരികമായി ചുമതലയേല്‍ക്കും. ഏറ്റവും അധികകാലം കോണ്‍ഗ്രസിന്‍റെ അധ്യക്ഷപദം വഹിച്ച അമ്മ സോണിയാ ഗാന്ധിയില്‍നിന്നാണ് അദ്ദേഹം പദവി ഏറ്റുവാങ്ങുന്നത്. 1998 മുതല്‍ സോണിയയാണു പാര്‍ട്ടി അധ്യക്ഷ.

Sponsored Advertisments

GP-Adv2
TSI-Adv